Մերկ քնելու 5 պատճառ. med.news.am

Գիշերային զգեստներով անկողին մտնելը շատերի մոտ վաղուց արդեն սովորություն է դարձել՝ չնայած բազմաթիվ գիտական հետազոտությունների արդյունքներն այն մասին են վկայում, որ այդ կերպ կարող եք քնի որակի վրա բացասական ազդեցություն թողնել, հիշեցնում է Medical Daily-ն:

Ընդհանուր առմամբ, ամերիկացիների ընդամենը 10 տոկոսն է մերկ քնում, այնինչ գիշերային հագուստներից ազատ քունը կարող է մի շարք առումներով՝ սկսած հորմոնալ հավասարակշռությունից մինչեւ ինտիմ կյանքի որակ, օգտակար լինել օրգանիզմի համար.

1. Որակյալ եւ խորը քուն
   Որակյալ քունը շատերի համար անհասանելի է մնում. մեկն անընդհատ արթանանում է քնից, մյուսը՝ այս ու այն կողմ շուռ գալիս, երրորդը՝ ժամանակ չունի քնելու, իսկ չորրորդն՝ ընդհանրապես անքնությամբ է տառապում: Ննջասենյակի ջերմաստիճանը եւ շրջակա միջավայրն օպտիմալ քնի կարեւորագույն գործոններից են համարվում: Կազդուրիչ արդյունքի հասնելու համար սենյակի ջերմաստիճանը պետք է 16-20°C սահմաններում լինի: Գիշերային զգեստները բարձր են պահում մարմնի ջերմաստիճանը եւ այդ կերպ զով միջավայրի ցանկալի ազդեցությունը չեզոքացնում:
   
   
2. Երիտասարդ արտաքինիգրավական
   Ննջասենյակի ջերմաստիճանը 21°C-ից ցածր պահելով՝ ծերացման դեմ աշխատող հորմոնի (մելատոնինի) բարեկարգ աշխատանքի շնորհիվ, մարմնին վերագեներացվելու եւ մաշկին ու մազերին առավել թարմ տեսք հաղորդելու հնարավորություն կընձեռեք: Իսկ ահա շոգ պայմաններում օրգանիզմն ի վիճակի չէ սեփական զովությունը պահպանել, ուստի մելատոնինի օգնությանն է դիմում եւ այդ կերպ հորմոնի աշխատանքի արդյունավետությունը նվազեցնում:
   
   
3. Հավելյալ քաշի կորուստ
   Բարեկարգ քունը ճարպերի կուտակման պատճառ համարվող սթրեսի դեմ պայքարի լավագույն միջոցն է: Խոսքը, մասնավորապես, սթրեսի համար պատասխանատու հորմոնի՝ կորտիզոլի մասին է, որի արտադրությունը հանգստի ռեժիմի պայմաններում, բնականաբար, նվազում է: Իսկ երբ անհարմար ջերմաստիճանի կամ որեւէ այլ գործոնի ազդեցությամբ անհանգիստ քուն եք մտնում եւ առավոտյան կորտիզոլի մեծ քանակով արթնանում՝ հորմոնի հրահրմամբ չափից դուրս մեծ ախորժակ դրսեւորելու եւ ձեռքի տակ ընկածն ուտելու ռիսկը, բնականաբար, մեծանում է:
   
   
4. Ավելի լավ ինտիմ կյանք
   Զուգընկերոջ հետ մերկ քնելով՝ օրգանիզմում «սիրո» հորմոնի՝ օքսիտոցինի արտադրություն կխթանեք, ինչն, իր հերթին, կարող է, ի հակադրություն կորտիզոլի եւ արյան բարձր ճնշման ազդեցությամբ ի հայտ եկած սթրեսի եւ դեպրեսիայի, սեռական գրգռվածության եւ օրգազմի բարձր հավանականության հանգեցնել: Իսկ որ օրգազմը անքնության դեմ պայքարի լավագույն միջոցն է՝ թերեւս բոլորը գիտեն:
   
   
5. Պաշտպանում է հեշտոցը
   Կանանցից շատերը խուսափում են մերկ քնելուց՝ կարծելով, թե դա հիգիենիկ չէ: Իրականում, ինչպես Լոս Անջելեսի համալսարանի գիտահետազոտական խմբերն են պարզել, վնասակար մանրէներն առանց գիշերազգեստի քնած կնոջ հեշտոց ավելի մեծ դժվարությամբ են ներթափանցում: Պատճառն օդափոխությունն է. առավելապես չոր հեշտոցում սնկային բորբոքումների առաջացման հավանականությունը նշանակալիորեն ցածր է:

Տղամարդկանց պարագայում մերկ քունը կարող է սերմնահեղուկի որակի բարձրացման հանգեցնել:

Հարցեր, պատասխաններ, մեկնաբանություններ